Jennifer Lawrence kritikon Cyrus-in

Të dyja janë vajza të reja në qendër të vëmendjes, por kanë një sjellje krejt të ndryshme nga njëra-tjetra.

Një ditë pasi Miley Cyrus shkaktoi sërish polemika me veshjen e saj në MTV Europe Awards, Jennifer Lawrence foli për neverinë që i shkakton kultura e të parit të femrave të reja si objekte seksi në industrinë e spektaklit.

Aktorja 23-vjeçare, e cila të hënën ishte e pranishme në premierën e filmit ‘Hunger Games: Catching Fire’, tha se është bërë e zakonshme seksualizimi i femrës në “showbiz”.

Kur u pyet nga BBC për shembullin që jep Miley Cyrus, fituesja e çmimit Oscar tha: “Seksi shet në këtë industri dhe për një arsye që nuk e kuptoj dhe që më neverit, seksualizimi i moshave të njoma shet edhe më shumë.”

Lawrence nuk përmendi emrin e Cyrus, por shtoi: “Disa njerëz ndihen shumë mirë me këtë gjë. Unë personalisht mendohem mirë në pamjen që shfaq në filmat e mi pasi dua t’i jap shembull të mirë vajzave të reja që më ndjekin.”