Celine Dion tregon problemet e martesës së saj

Kanë një martesë 18-vjeçare (që për botën e spektaklit është një kohë shumë e gjatë), por Celine Dion ka theksuar se lidhja me Rene Angelil, i cili është njëkohësisht edhe menaxheri i saj, nuk ka qenë gjithmonë “fushë me lule”.

Duke folur për revistën ‘Vegas Deluxe’, këngëtarja tha: “Kemi pasur momentet tona të këqia. Nuk ka qenë gjithmonë e lehtë. Kurrë nuk është e lehtë marrëdhënia burrë-grua dhe po t’i shtosh debatet që kemi pasur për koncertet, shfaqjet apo udhëtimet bëhet edhe më e vështirë.”

Cifti ka një diferencë moshe prej 26 vitesh dhe Dion është shprehur se komunikimi nuk ka qenë i mirë deri para 7 viteve.

“I kërkova këshillë një shoqeje, e cila më mësoi si t’i thoja gjërat në mënyrën e duhur. Komunikimi është shumë i rëndësishëm në martesë. Nëse flet për gjithçka me partnerin, të duket vetja sikur je në muaj mjalti gjatë gjithë kohës. Komunikimi është sekreti.”